الأخبار

عازف الإيقاع الشهير الخير عثمان ينعي الراحل حمد الريح..ويروي حكاية الساقية وجمهور بورتسودان

اول مره الاقي حمد في حفل في السينما الوطنيه بورتسودان وكنت وقتها جديد عهد باتحاد الفنانين وكان حمد من ضمن الفنانين زيدان وسميه حسن وعثمان حسين وكانت الساقيه في اوج قمتها وراس نميري مطلب شعبي غني عثمان حسين وسميه ونزلنا من المسرح في استراحه قصيره وكان البرد قارسا جلب لنا بعض الاخوه والأصدقاء ( دواء البرد) وحضر حمد وتمم علي الفرقه وسأل عن عازف الايقاع ورد له الاخ الاستاذ محمدجبريل بان عازف الايقاع اخونا الخير وبدهشه شديده ساله الخير منو ؟ قالي زول كويس بعزف معانه في فرقة زيدان وكانت فرقة زيدان اسمها في ذلك الوقت الفريق القومي اذ تضم عازفين مهره متمكنين كامثال محمديه والفاتح الهادي وترنتي ومحمد جبريل وعبدالهادي وسراج الثعلب وحاج لولو والزبير وعوض رحمه واخرين رد حمد والود ده ماحافظ لي الخته الفرقه دي منو ؟..عندما قدم المذيع حمدالريح هاج الجمهور وبداوا في ترديد عاش الشعب راس نميري مطلب شعبي…صعدت المسرح اخر زول وسالوني حمد قال نغني شنو؟ قلت لهم الساقيه واشرت بيدي لتستعد الفرقه للدخول في الاغنيه التي كنت احفظها عن ظهر قلب صعد حمد للمسرح حيا الجماهير وكان يسترق النظر الي دون أن يبتسم او تبدو عليه علامات الرضا وعندما اتت راس نميري .. ذهل حمد اتي وسلم علي في راسي وهنا زاد هياج الجمهور وصعدوا للمسرح وقبضوا بيدي ليلبسوني ختم وساعات وسلاسل المهم انتهينا من الحفل بعد ان ختمها العندليب الأسمر وذهبنا لحفل عشاء في شاليهات الكيلو وقتها ليبدا الغناء بالعود ونادني الاستاذ حمد الريح وقالي بالحرف الواحد انت زول فنان سامحني انا والله ظلمتك جيت من وين إنا ماقابلتك في الاتحاد .. جوازك موجود اجبته ؟ بنعم قالي تسلمه لخوجلي الفاضل بكره لما نرجع الخرطوم سلمت خوجلي جوازي وسالته انتو مسافرين وين؟قالي والله ماعارف وكانت اول رحله لي لمصر مكثنا ثلاث اشهر غنينا في الاوبرا وسينمات وسافرنا لاسوان والاقصر والواحات ثم عدنا لنغني للطلبه في الإسكندرية والسويس وكان الاستاذ حمد الريح محل حفاوه واستقبال نثر الفرح والقفشه في كل قلوب السودانين حتي المصرين اندهشوا وكانت السفاره تتابع حمد ويحضر كل اعضاؤها تلك الحفلات .. وكان حمد ذو علاقات واسعه في اي مكان نذهب اليه طيب المعشر رقيق القلب سافرت معه لدول الخليج وشرق أفريقيا اثيوبيا جيبوتي ارتيريا الصومال مع عثمان مصطفي وصلاح بن الباديه .خوجلي عثمان رحمهم الله .. رحم الله الفنان الانسان حمد الريح واسكنه فسيح جناته مع النبيين والصديقين والشهداء والصالحين وحسن أولئك رفيقا…

الخير عوض الله…

اظهر المزيد

مقالات ذات صلة

إغلاق